-->

أشهر مطاعم الباستا فى مصر بالصور

أشهر مطاعم الباستا فى مصر بالصور
مش كتير الأماكن المتخصصة في الباستا في القاهرة، وزيادة علي كده يكاد يكون مفيش فيهم مكان متميز بالباستا بتاعته وتبقي عايز تضرب له مشوار مخصوص… عشان كده #WhiteOwl … أو البومة البيضا... مكان متميز واضافة مطلوبة لمطاعم القاهرة
البومة البيضا محل باستا فتح من كذا شهر في المعادي… متخصص في الباستا المصنوعة منزليا… او الhome made pasta… وده ببساطة معناه انهم بيعملوا الباستا بتاعتهم بمعرفتهم… وديه بصراحة بتفرق قوي في الطعم ...يعني لما تبقي بتاكل باستا معمولة يوميها الصبح… الفرق ما بينها وما بين الباستا المُصنعة زي الفرق ما بين رغيف العيش الصابح وما بين كيس عيش بتشتريه من السوبرماركت… السما والارض







ابتدينا الوجبة بشوربة مشروم وفراخ بالكريمة… الشوربة دسمة ومليانة قطع مشروم صغيرة قوي بتعضعض كده ومخلية كل معلقة حلوة… من كتر ما الشوربة دسمة خوفنا نكملها لأحسن ما نعرفش نوصل للباستا
بعد الشوربة طلبنا بريسكت بإضافات متنوعة… البريسكت ببساطة عيش توست عليه اضافة…بينزل ٣ انواع غير بعض… المميزة فيهم البنجر… ما تسألش ازاي بس هي ديه الحقيقة… مشكلتها الوحيدة ان العيش بيبقي ناشف شوية فبيخلي اكلها صعب حبة
بعد البريسكت نزلنا طبق فيه سوسيس متقطع رفيع غرقان في زيت وبصل اخضر وصوص ليمون… ده اللي حكاية بقي ويستاهل المشوار لوحده… طبق ينول علي اعجاب المعدة الشرقية بس بطعم غربي خالص… انفجار من الطعم في كل قطمة… يمكن يكون مشكلته الوحيدة ان طعمه قوي زيادة عن اللزوم… بس فتح نفسنا تماما لما هو قادم
طلبنا نوعين من #الباستا… الطبق الأول صوص مشروم ابيض مع بط مدخن… باستا ملوكي لمن يبحث عن الطعم الفاخر والشبع المعتبر… باعتبر نفسي أكيل وواجهت صعوبة في اني اخلص الطبق…الباستا نفسها مظبوطة جدا ومرفوعة من علي النار في اللحظة المناسبة... عضتها محسوسة بس في نفس الوقت طرية... تخصص!
الطبق التاني باستا خضروات وديه كانت مخاطرة لأن عموما باستا الخضروات بتبقي مملة قوي… بس ديه برضه كانت مزيج من كذا طعم خلي أكلها متعة الصراحة…فلفل ومشروم وصوص جوز هند وصلصة طماطم… اعتقد اللي بيميز المكان ده عموما هو مزج كذا طعم مع بعض في نفس الطبق بشكل ممتاز
كمشروبات طلبنا ليمون بتوت بينزل دورق يكفي ٣ اشخاص… خفيف ومش مسكر بزيادة وبيديك فرصة تريح شوية من الحادق
الحلو بقي طلبنا حاجة اسمها كيكة عسل او honey cake… حاجة في منتهي الرقة والخفة والجمال والرشاقة والحلاوة… الكلمات ما توصفهاش…
عموما White Owl خروجة شيك… مكانه في حتة حلوة في المعادي والصبح قعدته مشمسة وبليل قعدته رايقة… المكان مش كبير قوي وديكوره ذوقه حلو والمطبخ مفتوح علي القعدة وده بيحسسك بحميمية كده لما تبقي شايف الأكل بيتجهز قبل ما ينزلك… الأسعار عالية شوية بس الطعم حلو والأحجام تشبع جدا أي أكيل… وتاني… ديه خروجة شيك بس تمنها فيها وهتلاقوا المنيو في أخر الصور
عنوانه ١٧ شارع ٢١٦ - دجلة - المعادي
تقييم وتصوير: محمد المعتصم

إرسال تعليق