أجمل أماكن الفسح والخروجات فى اسكندرية بالصور

أجمل أماكن الفسح والخروجات فى اسكندرية بالصور
البوست ده هيكون رقم 4 الي هتكلم فيه عن الاسكندريه خصوصا ان احلي جو لاسكندريه هو اليومين دول المطرة والنوات بقى والغرق اللى الواحد يشوفة ي الرحله مودها رومانسي شويه و برده مش هتكون مكلفه و مختلفه تماما عن رحلات الاسكندريه الي كتبت عنها قبل كده.
المواصلات:
*القطار
لحد دلوقتي و انا بكتب لسه تذكره القطار بتاع 8:10 الصبح ب 30 جنيه و ده قطار مكيف و نضيف جدا بياخد الطريق في 3 ساعات تقريبا عشان بيعدي علي كذا محافظه.
(نصيحه)
احجز دايما رايح جاي من المحطه بلاش تروح تحجز واحده من القاهره و تروح هناك تحجز رجوع من الاسكندريه عشان ممكن متلقيش فامن نفسك من القاهره دايما.
-في قطارين بسعر 30 جنيه رجوع من الاسكندريه و الاتنين الطريق 3 ساعات
+قطار 20:10
+قطار 21:15






ملحوظه مهمه
-انت لو هتاخد مخاطره انك تحجز و انت واقف تذكره انك تطلع علي القطار الي هيتحرك دلوقتي ممكن بنسبه 95٪ متلقيش تذكره
بس لو عايز تركب القطار ده فممكن تطلع عادي القطار من غير تذكره و هتلاقي المحصل بيدفعك تمن التذكره و عليهم 6 جنيه غرامه
بس المشكله ممكن متلاقيش مكان تقعد فهتطر تقعد علي الارض في فواصل العربيات و ديه امان طبعا و مقفوله بس الفكره لو هتقعد جنب المراحيض فهتفقد حاسه الشم.
*المايكروباص
و ده حل بديل من امام محطه القطار هتلاقي ناس بتنادي بتقول الاسكندريه و بتكون مايكروباصات مكيفه و نضيفه بس و سريعه بتاخد الطريق في ساعتين تقريبا.
- العيب الي في الموضوع
انك بتستني لحد ما يحمل العربيه و سعر الفرد 45 جنيه.
الوصل الي الاسكندريه:
+الفطار في مطعم جاد
طبعا لو بتفكر تفطر فممكن تجرب مطعم جاد و ده رمز من رموز الاسكندريه في الاكل المصري و الي مختلف تماما عن بتاع القاهره سواء نضافه او طعم.
هتلاقي كذا فرع منه الي عند كوبري استانلي و في الي في المندره علي البحر.
اطلب من عنده طعميه محشيه بسطرمه و بطاطس بالجبنه الموزاريلا و طبق واحد فول اسكندراني و طبق جبنه بالطماطم و بينزل عيش سخن معاهم.
هنا الاطباق كبيره جدا فبلاش تطلب كتير عشان مش هتخلص الاكل
التكلفه حوالي 65 جنيه.
+جوله بحريه
تركب مشروع من اي مكان هناك رايح علي بحري و تنزل عند القلعه و هتلاقي و انت ماشي جنب محل جيلاتي عزه مكان تركب فيه مركب تلف معالم الاسكندريه بيكون حوالي 45 دقيقه بس ممتعه.
هو هيبدا بسعر 150 جنيه لمركب كلها بس نزل معاه علي قد ما تقدر فقدرت انزل لي 130 و كنا حوالي 8 افراد فكل واحد دفع 15 جنيه و بتكون مركب بمظله و بيشغل اغاني لو حابب فهتنبسط جدا منها.
هناك في منطقه بحري هتلاقي مراكب اصغر و بيعرض عليك تطلع الفرد ب 20 جنيه بس انا مجربتهاش معاهم.
+القلعه
هتخلص الرحله اطلع اتمشي في محيط القلعه و اتصور و ادخل القلعه ب 10 جنيه و تقعد حوالي ساعه تقريبا.
+الغذاء في مطعم Sandwich Inn
هتلاقي نفسك جعان فننصحك تروح مكان من أحلى الاماكن فى الأسكندرية ..المنطقة أسمها كفر عبدة وهى مزيج بين أشجار المعادى و شوارع الزمالك وهدوء جاردن سيتى فمتخيل بقى لما يبقى فيها مكان بيعمل أكل هيبقى عامل أزاى ..الأختراع بقى عباره عن العجينة مخبوز بطريقة جديدة متهيألى باللبن والزبدة وده واضح من طعمة وملفوفة روول وفيها بقى كل ما تشتهى الأنفس خدنا من كل حاجة صنف.. المعروف خلاص ان كل الناس أبتدت تتجه للجبنة السايحة فى كل حاجة وطبعا دى حاجة متتفوتش فى العيش المخبوز دة ..بس خللى بالك الساندوتش ده محتاج يتساب أد 3 دقايق كدة بعد ما تقسمة نصين علشان تقدر تاكلة من صنف اللحوم ودى خدناها أستيك بالكاجو ..بس انت عارف لما تطلب أستيك فى طبق رئيسى ويجيلك مع صوص المشروم والطعم الجامد دة أهو نفس الطعم ومتضافلة كاجو تخيل بقى المتعة اللى الموضوع فيها من كل حاجة ..
+اسكاي روف باراديس ان
تخلص اكل تطلع قبل الغروب علي فندق paradise inn جنب محطه الرمل شارع الشهداء و تدخل الفندق و تطلع sky roof و ده عالم تاني هتحس انك قاعد جوه البحر و القاعده و الفيو روعه.
*ملحوظه
هتلاقي اسكاي روف ده مقسوم الي دورين
دور المينيمم ب 90 جنيه و الدور التاني ب 200 جنيه
الفرق ان الدور التاني بيقدم مشروبات كحولية لكن الدور الاول من غير.
طبعا 90 جنيه يكفوا انك تاكل و تشرب عشان مش غالي زي ما متصور بس الكميه في الاكل قليله طبعا بس المشروبات حجمها كبير جدا.
تعمل حسابك هتدفع بالضريبه 120 جنيه بس هتخرج فعلا مبسوط.
طبعا تقعد لحد معاد القطار بتاعك و تنزل ترجع القاهره و تعرف انك كنت في حلم جميل و يوم هيفرق معاك جدا.
ده المكان بتاعه علي جوجل ماب
17 El Shohada St. Ramal Station ., Alexandria, Egypt
** -الناس الي بتسال عن الاجزاء الاولانيه ممكن تتابعوها من خلال Traveller Experience بس لازم تعمل join عشان تقدر تشوف الصفحه من خلال الرابط :
مستني تجربتكم و رايكم و ناخد بالنا (الاكل اذواق)
تقييم: Moutaz Mohamed

إرسال تعليق