-->

حواوشى العزيزية بالصور والأسعار

حواوشى العزيزية بالصور والأسعار
#الحواوشى اكله مزاج وله مدارس مختلفة حسب تحضيره فى الحواوشى العادى اللى بيتعمل فى العيش البلدى سواء تسوية على الفحم او فى الفرن او على الجريل وفى الحواوشى الاسكندراني بيكون لحمة فى عيش مخبوز وفى الحقيقة بقالى فترة كبيرة بسمع عن العزيزية بمحافظة #الشرقية اللى هى أصل الحواوشى وفعلا شديت لها الرحال وعملت لها طالعة مخصوص وهى عبارة عن قرية قريبة من مركز منيا القمح وأهلها طيبين ومشهورة بالعيش باللحمة على مستوى الجمهورية





والمرحلة الأولى علشان تاكل هناك رغيف حواوشى صح هى إختيار جزار محترم ويكون أمين واخترت هناك واحد معروف بالاسم أسمه #ابو_يوسف كنت بسمع عنه وانا فى القاهرة بيقطع لك قطعية اللحمة والجزئية اللى تختارها بنفسك سواء عجالى أو ضانى بصراحة الكندوز أخف والرغيف حجمه كبير وبياخد بداية من ربع كيلو لحمة أو ثلث أو نص كيلو حسب رغبتك مع العلم أن الجزار نفسه بيحط لك البصل والتوابل والملح والفلفل الأخضر والطماطم وبيفرم اللحمة قدامك مع حتة دهن صغيرة تظبط الطعم وتاخد الكمية اللى تختارها من اللحمة حسب العدد وفعلا بلدى ممتازة وسعرها معقول بالنسبة لأسعار القاهرة بس متكترش البصل وتاخد اللحمة على الفرن " المخبز " ودى المرحلة الثانية وهناك المخابز شغلتها الأساسية فقط هى عمل عيش الحواوشى واخترت هناك مخبز أسمه#احمد_سمير مشهور جدا والناس هناك عندهم خبرة فعلا فى العجين والتسوية ممتازة وبعدين تنتظر ربع ساعة التسوية وتاخد الحواوشى وتطلع على أقرب كافيتريا على البحر زى ما بيسموه " اللى هي الترعة أو النيل "
بالنسبة للطعم بقى مختلف عن أى حواوشى أكلته بصراحة قبل كده ومختلف عن طعم العيش باللحمة الاسكندراني لأن التتبيلة مع اللحمة فى العزيزية خطيرة فعلا والتسوية بالعجين بتاعهم فوق الممتازة تجربة تستحق عناء المشوار 💪🏼
.. الأسعار كيلو اللحمة كندوز ب 120 جنيه شامل الإضافات وتسوية الرغيف 6 جنيه
... نصيحة محدش يروح يوم الأربعاء لان زحمة جدا جدا وده الموسم الخاص بالذبح عندهم والناس شغالة هناك طوال الأسبوع لمنتصف الليل

إرسال تعليق