أفضل أماكن شهر العسل - خطط شهر العسل بالصور

أفضل أماكن شهر العسل - خطط شهر العسل بالصور
البوست الأضخم لخطط شهر العسل(خد مننا مجهود ضخم يا ريت يتم التقدير )
بوست مهم لكل اللى هيتجوز قريب وبيفكر هيعمل أيه
مبدئيا كدة أنت بتتجوز يعنى هتعرف تاخد أجازة فتوقيت الأجازة مهم جدا ..
معروف أن موسم التزاوج عند المصريين بيبقى بعد العيد الصغير والعيد الكبير هو اه بيبقى توقيت مثالى للجواز بس مش التوقيت المثالى للسفر ودة علشان الدنيا كلها بتبقى أجازات فالأفضل أنك تتجوز فى الدراسة أو تستنى لما الدراسة تخش وتبدأ للأجازة دى علشان فعلا يبقى شهر عسل .. بس اللى خلاص مضطر ننصحة يدور على الفنادق اللى بتقبل الكبار فقط لان المستوى بيبقى أعلى شوية ..
فى ناس كتير اوى بتبقى أول سفرية ليهم هى سفرية الجواز والبوست دة متوجهه ليهم بالأساس ودة هنحاول نوضح فيه التوقيتات والاماكن المثالية لأجازة سعيدة ..
لان الشتاء قرب فهنتكلم عن اماكن الشتاء الاول







اول ما نقول شتاءيبقى وش الأقصر و أسوان ودة من خلال النايل كروز اللى بين الأقصر واسوان وبتبقى فى الغالب لمدة 4 أيام ووانت فى الاقصر تركب البالون فى وقت الشروق بيبقى متعة جدا ودة بيبقى تقريبا ب 600:1150جنية الفرد وممكن تتفق مع اى حنطور هناك وهو يظبطلك كل حاجة .. ممكن كمان تروح جزيرة الموز وتاخد شوية صور تجنن هناك وأنت دى هتروحها أزاى ..أنت بتروحوها عن طريق فلوكة فى النيل ودى حاجة فى حد ذاتها ممتعه اوى والفلوكة ممكن تاخد لوحدك ب 120 جنية تقريبا .. ووانت فى أسوان برضه ممكن تاخد فلوكة تانية ودى تدويك بقى النوبة وتنزل فى بيوت الأستضافة اللى هناك وتشوف الكرم اللى على حق والنضافة وراحة البال اللى متتعوضش ..( أللى بيتعرف انه عريس جديد هناك بيتقام معاه بالواجب اوى من أهل الكرم أهل النوبة ) ...
رحلة النوبة دى أساسا ممكن تكون لوحدها خالص وتنفض خالص للأقصر وأسوان بيوت الأستضافة هناك ( هى مش مسماها فندق ) بس بتتعامل معاملة أفضل فندق 5 نجوم من حيث كل شئ ..انت ع النيل ليل ونهار والمزارات هناك زى السد العالى ومتحف النوبة ومعبد أبو سمبل وكل الأثار الفرعونية اللى كلنا عارفنها ...بس بننصحكم لو رايح أبو سمبل ظبط نفسك على خميس أو جمعة علشان تحضر الصوت والضوء واللى هتفضل فاكرة لو بعد 10 سنين من روعتة
تانى مكان فى الشتاء مميز اوى ممكن يكون فى الفيوم وبالتحديد فى قرية تونس وهى فيها فنادق متنوعة كتير من اول 600 جنية فى الليلة لغاية 3000 والفيوم ممكن يتعمل فيها حاجات كتير ( بس معظمها فرهدة بس كشهر عسل مش هتتنسى بردة ) انك تتسلق الجبال أو تتفرج علي الشلال و تتزحلق علي الرمل و تعمل مغامره مع البرشوط أو تركب فلوكه في البحيره و تاكل الاكل الفلاحي الجميل ..لو حابب الفرهدة تبقى زيادة هيلاقيها كويسة زى انه يلعب كل الالعاب المائية والطيران عند البحيرة المسحورة وممكن تعمل كمان سفارى فى وادى الحيتان ووانت هناك فعلا مش هتعرف تعد النجوم من وضوحها وعددها اللى فى السما واللى تقريبا مبيتشافش بالوضوح دة فى اى مكان
المكان التالت اللى ممكن يكون مختلف هو واحة سيوة ودى ممكن تعمل فيها رحلات سفارى فى بحر الرمال وفى مكان جامد هناك و هو عين كيلوباترا و ده مكان بدوي مشهور بمياه العين الكبريتيه الي بتشفي من امراض الروماتزم و غيرها و بتتميز بانها بتكون سخنه 24 ساعه عشان طالعه من علي عمق 1000 كم من بطن الأرض و هتلاقي شخص من اهل البلد كل وظفتوا انه يحافظ علي نظافه العين ديه عشان ديه مصدر دخل ليهم و هتلاقي حوليها قعدات بدوي ممكن تقعد تنبسط فيها..
بعد كده ممكن تروح علي عين فطناس و ده ميقلش شهره عن عين كيلوبترا بس المكان ده هتشوف فيه غروب الشمس و تاكل ابومردم و ديه الفراخ المدفونه تحت الأرض و معاها الملوخيه البدويه و بعد اما تخاص اشرب بقي الشاي البدوي الي مش هتشبع منه و من حلوته
نوصل بقى للدارج واللى بنقولكم الافضل انكم تدحجزوا الفنادق اللى للكبار فقط ..
شرم الشيخ البدايه بتبقى انك بتتسكن فى الفندق من الساعه 12 الظهر واليوم ده الافضل ليك بعد تعب السفر أنك تستكشف الفندق اللى انت فيه وتنزل حمام السباحه او تروح البحر الخاص بالفندق لو عندك وقت لان ده اكتر يوم بيبقى فى فرهده 
الحاجه بقى اللى ممكن تتعمل تانى يوم وهى برضه تجربه جميله جدا انك تعمل رحلة بحريه اليوم كامل ودى ممكن تسال فيها فى الفندق نفسه وهما هيدلوك على افضل طريق علشان محدش يضحك عليك وبتبقى فى مكانين يا اما فى منطقة رأس محمد او عند جزيرة تيران ( أه لسه عادى الرحلات شغالة هناك مفيش اى مشكلة ) دى بتبقى للفرد من 200 ل 300 جنيه بس حاجه جميله جدا وهما بيوفرولك الانتقالات من والى اليخت وطبعا اعمل حسابك فى مايوه علشان تستمتع واللى مبيعرفش يعوم قعدة المركب لوحدها كفايه اوى اوى ودى بتبدأ تقريبا من 8 الصبح وبتخلص على الساعه 4 العصر وبتبقى شامله الغداء و المشروبات على اليخت
انت هترجع هلكان ومش قادر بس أفتكر انت مش جاى تقعد فى فندق ممكن تاخد العشاء بتاعك فى الفندق وده بيبقى ممتد فى معظم الفنادق لغاية الساعه 9 ونص بس انت حاول تكون مخلص على 7 وجاهز وبعد كده تشد الرحال على ألف ليله وليله وده مكان بيقدم سهرات دى بقى ممكن تاخد تاكسى على حسب المنطقه اللى انت فيها أو ميكروباص عادى ( الاجانب بيركبوا الميكروباص عادى ع فكره مش حاجه بيئه يعنى ) التكت ب100 جنيه لعرضين واحد تراثى والتانى فلكلور وشرقى وتقريبا بيبدأ من 9 وينتهى 12 
هترجع تنام وتستعد لليوم التالت وده بقى ممكن تطلع محمية رأس محمد بعد ما تخلص فطارك فى الفندق بس المرادى من البر بقى مش البحر ودى مختلفه خالص وممكن تتفق مع ميكروباص لو انتم مجموعه ب 400 جنيه تقريبا او تاكسى لو قليلين ب 200 جنيه التكت ع البوابه ب 10 جنيه او حاجه هتقابلك البوابه الصخريه اللى لازم هتقف تتصور عندها وبعد كده تخش على أشجار المانجروف وشق الزالزال انت فى المحمه تشوف وانت ع الشاطئ السمك الالوان والشعاب المرجانيه وفى منظار ممكن تشوف منه المراكب والسفن اللى ماشيه حاجه وهم من الخيال ... هتخلص يومك وترجع تاخدلك العشا برضه و تنام ..تنام مين انت مش جاى تنام هتغير وتنزل على منطقى سوهو سكوير وممكن تقعد فى اى مكان هناك او تتفرج على النافوره الراقصه ولما تخلص ممكن تطلع ع السوق القديم وتشتريلك اى حاجه ومتفاصلش كتير علشان نساعد الناس اللى هناك
فى مكان أسمه هولييود هنتكلم عنه فى بوست منفصل وكمان الصب مارين
هترجع تريحلك شويه وخلاص انت هتسافر وترجع تانى كمان شويه وممكن تنام فى الاتوبيس هتريح شويه وتصحى الفجر تجرب رحلة السفارى اللى ممكن برده تنسقها مع الناس فى الفندق
مرسى علم يعنى الأستجمام والنقاء والرحلات اللى مفيهاش دوشة أنت لو رايح أستجمام أو شهر عسل وهتقعد فى الفندق وبس فمرسى علم من أفضل الاماكن اللى هتلاقى فيها الجو ده ..لكن لو أنت عاوز رحلات ومغامرات وحاجات ومناظر جديدة فركز فى اللى جاى بقى
أول حاجة لازم تعملها أنك تزور القلعان ودى حوالى 65 كيلو من مرسى علم دى بقى شجرة كدة فى وسط المياة فى منطقة حنكوراب ويفضل زيارتها قبل المغرب بساعتين علشان تستحمل الشمس وتستمتع بالمنظر الموجود ( الشجرة محاطة بحبال فمتتخطاش الحبال دى بعد أذنك )
أنت فى المكان ده كدة تبقى واقف فى المكان اللى يعتبر من أجمل وأفضل 20 شاطئ حول العالم ..عارف سمكة نيمو بتاعت الكارتون دى هتلاقيها هناك كتير اوى وسط الشعاب المرجانية ( حافظ على كل حاجة هناك لان دى محمية طبيعية تتبع محمية وادى الجمال ) يعنى حافظ على الشعاب المرجانية ..
اليوم التانى بقى ممكن تروح تجرب تنزل المياه فى منطقة النيزك ودى الأسطور بتقول أن الحتة دى نزل فيها نيزك فعمل التشكيل الشاطئى اللى موجود ده ..المنطقة دى صعب اى حد يوصلها الا اللى عارفها فحاول وانت فى الفندق تسأل الناس عليها لانها مش ع الطريق علطول وبتتمشالها شوية حلوين جوة مدق صغير كدة ..
أخيرا بقى اليوم التالت ممكن تجرب شاطئ مرسى مبارك ( هو أسمة كدة ملناش دعوة 😊 ) ودى أنت بتروحها عن طريق لنش ولما توصل الشاطئ دة هتشوف ال الدوجونج ودة بيتسمى فيل البحر او عجل البحر وهتشوفة قريب منك عادى جدا ( على فكرة هو ضخم جدا عكس ما أنت بتتخيلة فى الصور ) ..حاجة مسالمة بس متلمسوش وكمان هتشوف سلاحف كتيير جدا 
أنت بعد كل يوم من اللى هتشوفة وهتعملة ( الموضوع فيه مجهود ) هترجع مش قادر بس لو حابب النزول بليل مش هتلاقى حاجة فى مرسى علم ممكن تطلع على بورت غالب بتاكسيات عادى ( التاكسى هناك عربيات ربع نقل ) والمسافة مش كبيرة أوى .
الجونة المكان المثالى لشهر عسل تعتبر فى الغردقة متبعدش عنها كتيير وهى الوجهه الاولى لك اللى بيدور عن شهر العسل ومينفسهاش فى الميزة دى ألا سهل حشيش ومرسى علم 
أحنا بنفضل اللى معاه عربية يروح بيها المشوار لذيذ وطريق الجلالة الجديد سهل الموضوع كتيير المسافة تقريبا 450 كيلو ( الجونة بعد بوابات الغردقة ب 4 كيلو ) بس خللى بالك فى ردار ..اما الاتوبيس فممكن تركبة من التحرير او الماظه او ال الجيزة والاسعار بتختلف الصبح عن بليل وعن جودة الاتوبيس نفسه لكن بقى العريس اللى رايح هيفضل الطيران طبعا والمسافة بين المطار والجونة نص ساعه تقريبا
فنادق الجونه 90 % منها كويسة فانت تعمل ايه بقى تخش تشوف متطلباتك على بوكينج وتشوف الفندق وتتصل تحجز من الفندق مباشرة يعنى لا تحجز من بوكينج لانه غالى ولا عن طريق شركات السياحة لان معظمهم بيبقى رخيص علشان بيأجروا أقدم غرف الفندق وده لاحظناه كتير فى سفرياتنا الأخيرة .. فى نقطة مهمه اوى فى بعض الفنادق للكبار فقط فلازم تتأكد قبل ما تحجز من النقطة دى ( والفنادق دى بنرشحها لشهر العسل ) ..
الميزه فى الجونه أنك لما بتتمشى فى الميناء أو الممشى ممكن تعدى من فندق لفندق فالموضوع سهل وفى تغيير كتير وفىها كمان مكتبة سفارة المعرفة ودى هنعملها بوست منفصل والمكتبة دى مرتبطة اليكترونيا بمكتبة الأسكندرية ..ويا سلام لو حظك حلو وفى أيفنت فى الجونه المدينة جمالها بيزيد اوى اوى فى الوقت ده ( يعنى لو بطولة أسكواش مثلا )
المطاعم والكافيهات هناك على قفا من يشيل ومعظمها مميز جدا بس غالية شويتين ( بس بصراحة تستاهل ) لكن لو عاوز تنزل بالسعر شويه ممكن تروح وسط البلد وهتلاقى مطاعم من كل الجنسيات تجرب اللى انت عاوزة هناك .. وانت هناك هتلاقى السوبر ماركت جنب كل فندق والصيدليات عادى يعنى مش هتغلب انك تجيب حاجة ..
الالعاب المائيه موجوده كتير اوى فى كل فندق ممكن تستفسر عن اللعبة اللى انت عاوزها او تركب الجلاس بوت ( مميزه اوى لو معاك أطفال ) ..انت بقى لو تعبت من المشى هتوقف توكتوك 😊 أيوه توك توك بس بالوان مبهجه وجديدة وتشجعك أنك تركبة والتسعيرة ثابتةالتوكتوك ب ١٥ جنية لو فرد واحد و ٢٥ جنية لو ٢ او ٣ جوة الجونة دة غير ان الفندق بيبقى عامل اتوبيس مجانى بيطلع كل فترة
أحنا حاولنا نتكلم عن الجونه وانت قاعد جواها لكن انت ممكن تخرج وتستمتع بكل اماكن الغردقة عادى بس اللى رايح الجونه رايح يستجم ويتمتع مش رايح يتنطط

إرسال تعليق