أشهر أماكن الأكل الشعبي فى مصر بالصور وعناوين المطاعم

أشهر أماكن الأكل الشعبي فى مصر بالصور وعناوين المطاعم
مبدأياً هنبدأ الموضوع بأهم حدث في عالم الأكل السنة دي تِماً : عودة #كبدة_البرنس بعد حوالي ٤ سنين غياب. والعظيم في الموضوع إن مستواه يعتبر ٨٠-٩٠٪‏ من طعمه بتاع زمان. طاجن فتة باللحمة وملوخية سادة وربع لحمة محمرة وربع كبدة بالصوص وربع سجق باللية، أكلة تسدّك ٣ إيام قدام.

من الأماكن اللي -لتالت سنة- يسيطروا علي مشهد الأكل هو #صبحي_كابر ، السنة دي صبحي غّير مكانه لمبني كبير في شبرا في الساحل، ومكانه القديم اللي في روض الفرج بقي ديلڤري وتيك أواي بس. صراحتاً مفيش حد راح الفرع الجديد وإتضايق، إلا إن في الويك إند الزحمة بتبقي مش مفهومة، حاجة مش منطقية تماماً. ما زالت الناس بتقول أشعار في الملوخية والريش والستيك بتوعه. بس من وجهة نظر ناس معينة، صبحي فقد بريقه لما الفرع القديم بجو الشارع والmood اللطيف بتاعه قفل. وهي أذواق في الآخر.

نخش علي عالم الموشيات، فا باب الشعرية وميدان الجيش كانوا هما الجبهة الرئيسية السنة دي، من أول #كبابجي_أبو_طاهر (السياحي) وجودته الخيالية في المشويات، مروراً ب #كبابجي_النصرووليمة الكفار اللي بيقدمها ، لغاية #كبابجي_الصفا في ميدان الجيش. يليهم #كبابجي_الرفاعي في السيدة اللي مستواه (علي عكس كل التوقعات) فضل نوعاً ما علي ما هو عليه رغم وفاه الحج محمود الرفاعي..ويسجي بعد كده #عبلة في الكرداسة ، و #أبو_أشرف في الجيارة و #جمال_الشلقامي في الجيزة..
أما بالنسبة لأماكن المشويات المحندقة : فيه مكان في مدينة نصر فتح السنة دي إسمه #فراخ_وكفتة، رغم إن أكله بيتأخر شوية عشان بيشوي طلب بطلب. بس الفراخ المشوية والحواوشي عنده رُهاب.

لو هنتكلم عن الأماكن اللي بتقدم أكل مطبوخ في اللية، فا التألق كله السنة دي كان لعربية #أبو_كريمفي ميدان الجامع في مصر الجديدة ، و مطعم #أبو_الهنا في شبرا الخيمة و #مسمط_المدينة

بالنسبة للأكل العرباوي (البدوي) فا الكلام كله السنة دي كان عن #واحة_خطاب في طريق برج العرب و #قرية_هاني و #خيم_المندي في الكرداسة..

أما بالنسبة لحبايبنا اللي في إسكندرية، الكلام كله عن #إبن_البلد ، الخطير عنده الممبار والرز المعمر والبط.

وأخيراً المطاعم اللي بتقدم أكل مصري بس علي نضافة وشياكة وcoziness وكده..فيه #مزمزةمشهور بإن عنده أعظم شركسية..








إرسال تعليق