أشهر المطاعم السورية فى مصر بالصور والعناويين

أشهر المطاعم السورية فى مصر بالصور والعناويين




السوريين علي مدار الكام السنة اللي فاتوا وهما بيعملوا شغل عالي أوي في كروشنا. سواء كميات، جودة أو أسعار، الناس دي دايماً بتسعي إنهم يقدموا حاجة نضيفة.

خلينا متفقين إن نسبة كبيرة جداً من الناس أول ما بتيجي سيرة "أكلة سوري"، بييجي في دماغهم أول حاجة #أنس_الدمشقي ، أنس من الأماكن اللي إقتحمت المشهد السوري السنة بقوة. فروع كتير، جودة ثابتة، نظام، ديلڤري سريع، وفوق كل ده : منيو مبيخلصش. بس صراحتاً في أوقات في وسط الزحمة بيبقي فيه إنخفاض في الجودة. بس في أغلب الأحيان سواء رايح تاكل شاورما، مناقيش، فتة، بروستد أوي حتي پيتزا..أنس دايماً في تألق،

في الجزء الشرقي من البلد، في وحش كاسر إسمه #خيرات_الشام في التجمع، ده بقي مفيش حد في التجمع مضربش من عنده قبل كده، والجدير بالذكر كمان إنهم كويسين أوي في الcatering، يعني عزومة خفيفة أو عيد ميلاد ع الضيق في أي حتة، ممكن تلاقي ترابيزة مليانة سندوتشات شاورما بإمضاء خيرات الشام. الشاورما عنده فاخرة، الفراخ المشوية كذلك، لكن البروستد بتاعه عادي أوي بصراحة..

نخش علي مدينة نصر، #الجناني فاتح دولة سورية صغيرة قدام السراج مول. نسخة مُصغرة من المطبخ السوري، فلافل سوري تلاقي، فتة حمص، شاورما، الفراخ المشوية عنده بيبقي عليها إقبال مش مفهوم، مناقيش، سندوتشات فاست فوود، بروستد..كله عنده عظيم بصراحة وأسعاره لطيفة أوي.
وفيه #الدباغ ده من الأماكن اللي مشكوك في أرباحهم. هو غالباً محل تخصص زباين ديناصورات مش بني آدمين من كتر ما كمياته مش مفهومة، هو بيعتمد ع الفاست فوود بس، سواء سندوتشات أو وجبات، فكرة إنك تخلص طبقك بالكامل لوحدك دي مش واردة عندهم خالص.

في بقي برنس في نفسه كده إسمه #أبو_يوسف في المهندسين، ولسه فاتح فرع جديد في مصطفي النحاس في مدينة نصر. ده بإجماع الخبراء الأكيلة : من أبطال العالم في الفراخ البروستد، قرمشة صح، تسوية صح، طعم رهيب، وبييجي معاها شوال بطاطس محمرة وتومية وكول سلو..

نيجي الفرع الرئيسي للسوريين في مصر : ٦ أكتوبر ، فا عندنا ٣ أماكن أساسيين : #روستو ، وده مستواه فيه تقلبات كتير. و #ست_الشام متألقة في الشاورما، و #أهل_الشام يعتبروا من أبطال المناقيش هناك..


إرسال تعليق