رحلات إلى أسوان بسعر 200 جنية 3 أيام بالصور

رحلات إلى أسوان بسعر 200 جنية 3 أيام بالصور
رحلات إلى أسوان بسعر 200 جنية فقط 3 أيام بالصور ، اسوان باقل من (٢٠٠) جنيه يابلاش😍😍
(*) نبتدي كلامنا عن القطار فيه درجه مميزه (عادي بدون تكيف) ب (28.5 ) ودا انا ركبتو وانا رايح من القاهره لاسوان وفيه تانيه واولي مكيفه اسباني ب (67 و ١٣٢) و فيه اولي وتانيه vip ب( 135و235 )و قطار النوم فردي ومزدوج ب (300 و500)
(اليوم الاول)
هننزل في محطه اسوان وصلت الساعه 7 صباحا هنلاقي ميدان المحطه قدامنا ناخد شمال الشارع دا اسمه سعد زغلول في اول يمين هنلاقي فندق اسمو اكتوبر ب 35 جنيه الليله نزلت فيه متواضع جدا يدوبك علي النوم جنبه علي اليمين نزل شباب ب 37 جنيه الليله شامله وجبه افطار نرجع تاني لشارع سعد زغلول تكمله في سوق سياحي فيه فنادق صابر و النوبه و رضوان كلهم ب 50 جنيه الفرد غرفه مزدوجه
نحط شنطنا ونرتاح شويه وفيه محلات اكل كتير حوالين المحطه وفي partition لشباب الخرجين بيفتح بليل بيعملو كريب و وافل و زلابيه حاجتهم حلوه ورخيصه ونضيفه ونبتدي فسح هنرجع تاني قام محطه القطار علي طول النيل هتلاقي معديه ب 1 جنيه هتاخودها وتعدي البر الغربي فيه هناك مقابر النبلاء وقبه ابو الهوا مكتب التذاكر علي الشمال دفعت 5 جنيه كا طالب مع اني مخلص الجامعه بس كنت واخد الكارنيه معايا نفعني اوي ولو مش طالب ب 10 البس حجات مريحه عشان هتطلعو 165 سلمه وبعد كدا هتطلعو علي رمل هتاخدو احلا صورمن فوق اسوان فيه تحت جمال للي عاوز يركب وهوا طالع وهوا نازل انا مركبتش وفيه واحد عندو بيت موجود فيه تماسيح تتصور معاهم
نرجع تاني بالمعديه للبر الشرقي في جزيره في نص النيل جزيره الفنتين فيها فندق Mövenpick فيها مقياس النيل وكانت مركز تجاره العاج الافريقي ايام الفراعنه وبها معبد خنوم ومتحف اسوان ووراها جزيره النباتات وهى من أقدم الحدائق بالعالم ، تقع حديقة النباتات بأسوان على جزيرة بأكملها. وتحتوى على العديد من الأشجار والنباتات النادرة لازم تركبلها مركب خاص لو عدد كبير اركب وهتتقسم لو قليلين يا تتشعبط مع حد يا تفكس من نفس الحته بتاعت المعديه في ميكروباصات بتروح صحاري ب 2.5 اركبها وانزل غرب سهيل اخر النهار قريه نوبيه ياتنزل وتركب توكتوك ب 10 جنيه يا تتمشي تلت ساعه وهوا رايح غرب سهيل بيعدي من فوق خزان اسوان هترجع الفندق تريح شويه لو فيك صحه اتمشي شويه في الشوارع المحيطه خد فكره ونام حلو عشان تبتدي اليوم اللي بعده من بدري








(اليوم التاني)
قطر بيروح السد العالي ب 1 جنيه هتنزل السد وتتصور مع بحيره ناصر ورمزالصداقه بس في حاجه رخمه في السد انك مينفعش تمشي براحتك هناك حتا لو عشرين متر ممنوع قريب منه جدا من السد معبد كلابشه بس لازم مركب خاص وانتا راجع اركب ميكروباص رايح صحاري او محطه اسوان قلوا عاوز انزل اقرب حته لجزيره فيله هينزلك تتمشي حتا ربع ساعه هتركب مركب خاص ب 100 جنيه واصحاب المراكب رخمين اوي لو انتا واحد بس بردو تطلع في مركب لوحدك فا اتشعبط مع اي حد او جروب حتا لو كانو اجانب انا ركبت المركب مع وحده مرشده جدعه مع اتنين سياح صينين واخدت رقم المرشده عشان ارجع معاها وانتا راجع بالمركب هتشوف عمدان حدي وسط الميه دا مكان المعبد القديم قبل ما يتنقل نرجع بقا بميكروباص للمحطه ممكن تنزل في منطقه المسله الناقصه وهتروح تريح شويه وبعدين تتمشي بليل في سوق السياحي الفقديم وسوق السيده نفيسه وانتا راجع اتمشي علي الكورنيش لحدالمحطه قريبه الكورتيش حلوجدا بليل ونرجع ننام
(اليوم الثالث)
نيجي بقا للشقا لابو سمبل 290 كم جنوب غرب أسوان قرب حدود السودان 3 ساعات رايح و3 جاي يعني عاوزله يوم لوحده معبد حلو جدا بس مشكلته انو بعيد جدا هتركب ميكروباص بيروح الموقف الاقليمي من قصاد المحطه ب 1.25 وتركب ميكروباص ابو سمبل ب 40 جنيه هوا حلو عشان لسه محتفظ بالوانه وممنوع ان المرشدين يشرحو جواه عشان المحافظه عليه لو تعب عليكو ممكن تشوف صورتو علي الجنيه في بعد كدا معبد كوم امبو يبعد بالقطار 40 كيلو قطاردرجه تالته مطوره ب 1.5 وتانيه مميزه ب 3 تنزل محطه كوم امبو تسال علي عربيات البياره كبينه ب 1 هينزلك عند المعبد هتدخل المعبد و متحف التماسيح بنفس التذكره وفيه معبد ادفو يبعد بالقطار 109 كيلوالدرجه التالته ب 3 وتانيه ب 5.25 تنزل محطه ادفو وتركب عربيات الرامادي ب 1.25 قولو نزلني عند المعبد انزل وهيشورولك المعبد فين بالظبط هتطلع بعد معبدادفو علي الاقصر بعدها
تقدر تركب من الموقف الاقليمي في اسوان بردو كل حاجه لو مش عاوزين القطار زي (ادفو - كوم امبو - السدالعالي - ابوسمبل )
(نصائح هامه )
اهم حاجه الصحبه في السفر تكون حلوه يعني اختار كويس و الشنط متبقاش تقيله مش لازم تاخود الدولاب ولو معاك كارنيه الجامعه هاتوا هتاخد التذاكرالمعابد ب5 لومش معاك يبقا التذكره ب10 وتقل كويس خصوصا لو مسافر بليل و خد اكل كتير يكفيك 3 واجبات الشتاء بيحب الاكل هتجوع يعني هتجوع خد صور كتير و لو متعاده ومش محتاج تاكسيات في اسوان الميكروباصات هناك رخيصه ب ١.٢٥ واغلي حاجه ميكروباص صحاري ب 2.5 يارب تنبسطو انشاء الله باسوان و تجربوا اسوان بنفس الطريقه ديه
تجربه:Mohamed Shaaban
تصوير:Moutaz Mohamed

إرسال تعليق