تجربتي في السفر الي كندا - معلومات عن كندا بالصور

تجربتي في السفر الي كندا - معلومات عن كندا بالصور
تجربتي في السفر الي كندا
كندا بلد حلوة وأمنة جدا وشعبها طيب وغلبان اوي.. اي حد هناك سهل جدا تفتح معاه كلام ومش هتواجه عنصرية زي بلاد تاني كتير.. الناس هناك بتسمي كندا The country of everybody عشان ليها 150 سنة بس ومتكونة من ناس كل انحاء العالم فا بيرحبوا بالاختلاف الثقافي وبأي حد حابب يعيش هناك وبيعتبروا النقطة هي الي بتميزهم عن اغلب بلاد العالم.. كندا كمان مليانة بحيرات ومناظر طبيعية في كل حتة وفيها تنوع كبير بين كل مقاطعة والتانية.
.
الرحلة كانت في مقاطعتين Ontario و Nova Scotia
الاماكن الي زرتها في Toronto, Ontario
CN Tower (تاني اكبر برج في العالم بعد برج خليفة)
Canada's Wonderland (مدينة ملاهي كبيرة اوي وحلوة جدا)
Toronto zoo (حديقة حيوان كبيرة جدا ومليانة حيوانات كتير اول مرة تشوفها)
Niagara falls (أكبر شلال في العالم علي الحدود بين امريكا وكندا.. مكان تحفة جدا)
التنقل في Toronto سهل جدا وفي تذكرة كده بتشتريها ب 5 دولار تقريبا تخليك تركب مترو وباصات براحتك اسبوع كامل
اشهر المولات للتسوق هي Yorkdale , Eaton
الاقامة في Toronto كانت في فندق اسمه Toronto plaza (3 نجوم) اليوم كان بحوالي 70 دولار غرفة Double شامل افطار فقط بس الفطار كان وحش وكنا بناكل برة
تكاليف الاكل في اليوم تقريبا 20 او 25 دولار تأكلك 3 وجبات
وابعدوا عن المطاعم المحلية غالية اوي.. اتغديت في مطلعم ب 35 دولار اسمه Jack Astor's
.




الجزء التاني من الرحلة كان في مقاطعة Nova Scotia جزيرة Cape Breton دي جزيرة حلوة اوي ومن احسن الجزر في العالم.. المكان ده هادي جدا وعالمحيط وفيه جبال وغابات وحيوانات ومجاري مائية وحاجات حلوة كتير... مقعدتش هناك غير يومين وخدت جولة استكشاف المكان وبس ومعرفش اماكن هناك
.
في اماكن حلوة كتير في Toronto انا مرحتهاش زي Casa lama و Aquarium و China town وفي مقاطعات تاني حلوة كتير زي British Colombia بس دي بعيدة جدا
.
تكلفة الرحلة كانت حوالي 1400 دولار كندي شاملة الطيران من القاهرة ل Toronto ذهاب وعودة وطيران داخلي بين Toronto و Sydney, Nova Scotia ذهاب وعوده والاقامة 11 يوم والانتقالات ودخول كل الاماكن الي زرتها وتمن الفيزا ( الاسعار دي عشان انا كنت طالع رحلة مع الجامعة وكانت مدعمة جامد لكن هي تكلفتها الفعلية اكتر من 3000 دولار غير مصاريف الاكل والمشتريات
.
الجو في كندا معروف انه برد جامد طبعا في اغلب المناطق فا الي يفكر يروح في الشتا يتقل جامد.. في الصيف الجو متقلب جدا يعني انا مثلا وصلت Toronto الحرارة كانت 25 تقريبا والجو شمس وحلو وبعد يومين الحرارة بقت 5 والشمس غابت ومطر اشتغل يومين ورا بعض
.
بالتوفيق لكل الي حابب يروح هناك

إرسال تعليق