لو مسافر البرتغال لازم تقرأ الموضوع ده

لو مسافر البرتغال لازم تقرأ الموضوع ده
علشان نبقي متفقين، مينفعش تكون في أوروبا لأي سبب من الأسباب - خصوصا لو عندك الفرصة إنك تزور أكتر من بلد - ومتزورش بورتو في البرتغال
بورتو هي تاني أكبر مدينة في البرتغال من حيث المساحة بعد لشبونة، لكن من وجهة نظري المتواضعة ومن وجهة نظر ناس كتير غيري زاروا البرتغال؛ هي اجمل مدينة في البرتغال 











بورتو هي مدينة مش كبيرة اوي بتقع في شمال غرب البرتغال وبتطل علي المحيط الأطلنطي، وما ادراك ما المحيط الاطلنطي بقي 😉😉 يعني لو انت من عشاق السيرفنج مش هتلاقي أحسن من الأطلنطي علشان تسيرف براحتك 🏄🏄
من أكتر الحاجات اللي بتميز البرتغال بصفة عامة وبورتو بصفة خاصة أنها بلد رخيصة والسياحة فيها مش مكلفة زي دول اوروبية تانية كتير بالإضافة إلي أنها فيها مناطق جذب سياحي كتيرة وفيها حاجات كتير ممكن تشوفها ويمكن يكون فيها حاجات أكتر وأحلي من دول تانية كتير غالية وواخده شهرة عالفاضي 🤔🤔 علشان كده بنصح اي حد ممكن يتواجد جوا أوروبا ويكون عنده فرصة يسافر أنه يروح البرتغال ويشوف بورتو وجمال بورتو 😘😘
السفر لبورتو رخيص جدا لأن في شركات كتيرة زي رايان إير وبويلينج بتعمل اوفرز كتير لبورتو وفي بعض الاحيان ممكن يوصل سعر تذكرة الطيران رايح جاي لحوالي ٤٠ او ٥٠ يورو، ده غير ان السكن هناك رخيص جدا، وسواء كنت بتستخدم إير بي إن بي Airbnb او من عشاق السكن في الهوستيلز - زي حالاتي 😂😂 - هتلاقي دايما أسعارهم ارخص من اي مكان تاني ممكن تلاقيه في أوروبا، بنفس معايير الجودة والأمان اللي بيوفرهم Airbnb او الهوستيلز المختلفة. بردو الأكل هناك رخيص جدا خصوصا لو هتقعد كام يوم وعندك الامكانية انك تنزل السوبر ماركت وتعمل أكلك بنفسك، دي ممكن تكون ارخص من مصر بعد التعويم 😂😂
تعالوا بقي نشوف بورتو فيها إيه 👀👀:
* لازم اول ما تروح بورتو تجري علي كوبري دوم لويس Dom Luis bridge - اللي معمول فوق النهر علي إرتفاع ٨٥ متر وعلي شكل قوس - علشان تشوف بورتو كلها من فوق بجمالها وطبيعتها وجمال معمارها ومراكبها الجميلة اللي ماشية في النهر وتاخد اجمل صور ممكن تاخدها في حياتك 📸📸
* طبعا بعد ما تعدي الناحية التانية من الكوبري، متنساش تلف علي ايدك اليمين علشان توصل للمكان اللي ممكن تشوف منه الكوبري بالكامل عن قرب وتشوف جمال الكوبري وروعة تصميمه، وكمان تشوف لوحة بورتو كاملة بنهرها وكباريها ومبانيها الملونة اللي شكلها أكثر من رائع وكمان تشوف وطبيعتها الخلابة 😍😍 وبعد كده تروح تركب التليفريك جايا Telefrico de Gaía 🚠 اللي هيمشي بيك مسافة ٦٠٠ متر لمدة خمس دقايق من علي ارتفاع ٦٣ متر وهيمشي بيك فوق مدينة بورتو علشان تشوفها كلها من فوق وتقرب من كل التفاصيل اللي مقدرتش تشوفها كويس وانت فوق الكوبري 🔭، صدقني هتنبسط اوي 😊😉، التليفريك مش غالي اوي، ب ٦ يورو € الوان واي و ٩ يورو € الريتيرن تريب 
* بعد ما التليفريك ينزلك تحت تاني، هتجري 🏃وتروح ع ضفة النهر، اولا علشان تتصور مع الكوبري اللي منظره تحفة من تحت، وثانيا علشان تركب الصندل (مركب)🛶 اللي هيلف بيك في النهر حوالين بورتو كلها واللي شبه المركب اللي موجود في بورتو مارينا لو حد فيكم فاكره، واللي اعتقد ان فكرة مركب بورتو مارينا مستوحاة منه، والله أعلم 😂😂
* بعد بقي ما تخلص كل اللي فات ده، عدي للضفة التانية من النهر من خلال الكوبري، علشان تشوف احلي مطاعم وكافيهات موجودة عالنهر، وتتغدي من اكل بورتو وسمك بورتو 🐟 😍😍، ومينفعش تمشي من بورتو من غير ما تاكل فرانشيسينيا Francesinha اللي هي أشهر طبق في بورتو - وطبعا لو انت مسلم يبقي متنساش تأكد عليه أنه يعملهالك من غير لحم خنزير - وبعدها تحلي بالباستيل دي ناتا Pastel de Nata اللي طعمه تحفة ده 
* هتخلص غدا وتطلع علي ليڤراريا ليللو Livraria Lello ودي بقي بلوة من بلاوي الزمن وتحفة فنية ومصنفة كواحدة من أجمل المكتبات علي مستوي العالم، وبالمناسبة ده المكتبة اللي اتصور فيها سلسلة أفلام هاري بوتر بجلاله قدره 😂😂
* خلص فرجه في المكتبة براحتك وخد كل الصور اللي انت عايزها، واطلع بعد كده عل محطة الترام علشان تعمل بورتو ترام سيتي تور Porto tram city tour 🚋اللي فيها هتقدر تركب الترام الاصفر التاريخي القديم اللي بيميز مدينة بورتو واللي بيعتبر من أشهر معالم مدينة بورتو وأقدمها ويعتبر رمز للمدينة، واللي هيلف بيك المدينة ويوريك معالمها الجميلة وطرازها المعماري الفريد 🏘، ولو انت من محبي المتاحف؛ تقدر تروح متحف الترام Tram museumعلشان تتعرف علي تاريخ الترام في بورتو والبرتغال وتشوف النسخ والاصدارات المختلفة اللي كانت موجودة من الترام 😍
* تقدر بعد كده تروح علي حدائق قصر الكريستال Jardins do Palácio de Cristal علشان تشوف واحدة من أجمل الحدائق في بورتو والطبيعة الخلابة اللي فيها، واللي بردو هتلاقي فيها طوواويس حلوة كده في منتهي الجمال بتتمشي حواليك في الحديقة بألوانها الجميلة، وكمان وإنتا بتلف في الحديقة هتلاقي مكان كده عالي اوي هتشوف منه بورتو كلها والناحية بتاعة النهر وده منظر في منتهي الروعة وهيكون من اجمل المناظر اللي ممكن تشوفها في الرحلة كلها، وفي الآخر وانت خارج من الحديقة هتلاقي كلمة بورتو كبيييييرة مكتوبة باللون الكحلي - زي بتاعة امستردام كده 😍😍 - وفي ضهرها قبه كريستال كبييييرة، هناك هتاخد صور مش هتنساها طول عمرك 😉😉
وغيرها وغيرها، حاجات كتير جدا تانية ممكن تشوفها وتعملها في بورتو، لو عايز تعرف اكتر وعجبك الموضوع؛ ادخل ع جوجل ودور علي بورتو وشوف فيها ايه تاني حلو، وشوف اماكن وحاجات تانية ممكن اكون مذكرتهاش وممكن اكون معرفهاش أصلا 😂😂
شكرا ليكم، وآسف عالإطالة
لو عجبك الريڤيو؛ لايك وشير علشان الناس تعرف اكتر عن بورتو وجمالها 😍😍
واستوني في ريڤيو جديد عن مدينة جديدة في بلد تانية 👍👍
أسيبكم مع الصور

إرسال تعليق