السفر التطوعى

السفر التطوعى
الجروب هنا اغلب بوستاته عن سفر السياحه والفسح او سفر الشغل ...
بس ما شفتش خالص نوع من انواع السفر المميز جدا بالنسبالي وحبيت اكتكلم فيه معاكم
* السفر التطوعي *
حاجه من الحاجات اللي بتأثر ف شخصيتك وبتديك خلفيه كبيره جدا عن ثقافات الآخرين وطباعهم , عاداتهم وتقاليدهم + انك بيبقى سفرك بهدف خدمه غيرك بدون مقابل اطلاقا
في خلال السنتين اللي فاتوا ف حياتي دول ... قابلت لاول مره بنات وشباب جايين من بلادهم لمصر بهدف التطوع فقط
اول بنت قابلتها كانت جزائريه
انا عارف ان دي خطوه هاتستغربوها لو اول مره تسمعوا عنها زي ماكنت انا اول مره اعرفها , هيا قررت تجهز شنطتها , بسبورها , اوراقها وتحجز اول طياره وتيجي مصر
بهدف انها تدور على ناس محتاجه المساعده ... وتساعدهم
قررت تبقى ف مصر حوالي 20 يوم كاملين ف انها تتطوع في مساعده الناس , بتقف تعمل اكل من 9 الصبح لحد 6 المغرب مابين طبخ وتجهيز وتوزيع الاكل ده
وكمان بتتفسح وتروح وتيجي وبتعمل حاجات كتير جمب التطوع
قابلت ف السنه ونص دي برضو 2 من الارجنتين , بنت من الفلبين , بنت من الصين , بنت من كوريا , 1 من المانيا , 1 من نيجيريا , بنت من دوله افريقيه مش فاكرها , 2 من اسبانيا


كل دول جايين تطوع مابين بناء اسقف , تركيب وصلات مياه , اطعام لمحتاجين , اعمار وتنظيف مساجد , خدمات طبيه .... مختلف انواع التطوع
دول بقا اللي جايين من برا البلد
طيب ومن جوا البلد ؟
شهر 3 2017 كان في شباب وبنات محجوزلهم 3 عربيات قطر , زياده عن 500 شخص
اتجمعوا من مختلف اماكن الجمهوريه ... طلعوا اسوان تطوعا برضو
ركبوا اسقف لناس بيوتها سقفها واقع او مش بيحميهم , وصلوا وصلات مياه , قدموا معونات عينيه مابين بوتوجاز لسرير , مراتب , غسالات , قدموا جهاز عرايس في الحاجات الاساسيه
وغير اسوان في قوافل في اماكن كتير جدا ف مصر زي الفيوم , المنيا , الاقصر , قرى ونجوع الصعيد وقرى الشرقيه والغربيه ... تقريبا كل مكان في مصر
جوا مصر ممكن تتطوع مع اكتر من مكان زي جمعيه رساله , مصر الخير , صناع الحياه .. ودول نفس الجهات تقريبا اللي بيجيلها المتطوعين من برا مصر
____________________________
السفر التطوعي بيعرفك بناس جديده ممكن تكسب منهم اصحاب كتير
بتكسب فيها خبره التعامل مع الناس وبتتعلم حاجات كتير منهم
بتكسب معلومات وثقافات جديده عليك تماما ماكنتش تعرف عنها حاجه
بتعرف طبقات اجتماعيه ماكنتش تعرف انها موجوده ! سواء اغنيا او فقراء
بينمي فيك روح المساعده
السفر التطوعي برا مصر موجود وجوا مصر موجود
سافروا متطوعين هاتفرق ف حياتكم حاجات كتير جدا ... جدا
فوق ما هتتصور هاتلاقي الحقيقه
لو ليكم تجارب عن السفر التطوعي احكوها

إرسال تعليق