البوسنة كما لم تشاهدها من قبل بالصور

البوسنة كما لم تشاهدها من قبل بالصور
تقرير عن زيارة البوسنة من الثوابت عندنا ان أول زيارة لأي مصري برة بتكون تايلاند او ماليزيا او تركيا بس في أول تجربة ليا في السفر إخترت بلد مش كتير بيفكرو فيها خاصة ان طلبات السفارة رخمة شوية, أي حد كان يعرف اني رايح البوسنة يقولي و بتعمل في نفسك كدا لية!, على اساس انها بلد فيها حرب و بلد متدمرة و كدا.






خلينا نتكلم خطوة خطوة:
*التأشيرة
1- طلباتهم زي اي سفارة اوروبية فيما عدا حجز الفندق دا لازم يكون مدفوع و لازم الفندق او شركة السياحة تبعتلك أصل الفاتورة و قسيمة الحجز بالاضافة بقى ل ( كشف حساب بنك 3 شهور و HR Letter و حجز طيران مبدأي و تأمين سفر و باسبور ساري شوية كويسيين)
2- مش بيطلبو شهادة تحركات
3- مش هتحتاج تصريح أمني
*الفندق
1- في هوستلز اسعارها بتبدأ من 6 يورو للسرير و 15 يورو لو غرفة سنجل كله على بوكينج موجود بس طبعا الصيف الاسعار بتختلف
2- الاحسن تشوف مكان قريب من البشارشيا ال هو منطقة السبيل و السوق القديم
*الأكل
1- هناك هتاكل كفتة كتير بيقولو عليها تشيبابي "كباب" بس السئ في الموضوع ان معندهمش طحينة بس هتلاقي رايب طعمة جامد جدا دا بديل الطحينة  , هتاكل بوريك و دا تعتبرة فطير ملفوف صوابع بس طعمه حكاية برضو, عامة اللحوم هناك تاكلها و انت متطمن لان 95% منها حلال غير ان معندهمش لحم حمير و بيعتمدو على الضاني
2- هتلاقي سوبر ماركت Konzum دا زي كازيون عندنا في مصر هتلاقيه في كل حته و اسعاره كويسة
3- لو هتطلب شاي قوله Turkish tea لان اي حاجة تانية مش هتطلع شاي, هتطلع نعناع او بابونج و كمان حابب اضيف ان الشيشة هناك منتشرة و هما عامة شعب مدخن جدا
*الطيران
احسن طيران التركي و ارخص من اسكندرية و يا ريت يا ريت تحجز بدري
*المدن السياحية
العاصمة سراييفو دي فيها اغلب المعالم و تزور كمان ترافنيك و موستار و توزلا و كمان بيهاتش هي بعيدة شوية بس تستاهل الزيارة اغلب المدن ممكن تروحها بالقطر الصبح و ترجع تاني اخر اليوم للفندق في سراييفو
كام حاجة كدا بس حابب اقولهم "و الله البنات هناك مش بايريين عشان تفتكر انك هتروح تتجوز بسهولة, متحطش نفسك مطمع, الحرامية هناك مش منتشرين و هبل شوية مش محترفين بس تاخد بالك, انت كمصري هيفتكروك غني عشان بالنسبالهم اي حد بيتكلم عربي يبقى خليجي"
الشعب البوسني عامة شعب طيب جدا جدا و خدوم و بيساعد فعلا بدون اي حاجة و مش معنى كدا انهم ملايكة 
الجوامع هناك كتيييييير و المحجبات كتيير و ال مش محجبات كتير بمعنى ان الشعب متنوع و ايا كان لبسك مش هتحسي كبنت انك غريبة عن المكان.
البوسنة يتكتب فيها اكتر من كدا لو حد حابب يسأل عن اي حاجة يسأل أو يبعتلي و هجاوبه فيما عدا سؤالين ( الجواز او انك تدور على شغل هناك) صعب تلاقي شغل هناك بس ممكن تفتح مشروع تاخد عليه اقامة و الجواز لو تعرف واحدة و ناوي تتجوزها روح انما تروح سياحة على امل انك في الاسبوع دا هتتجوز يبقى متتعبش نفسك.

إرسال تعليق