طريقة حجز ارخص تذكره طيران ذهاب وعودة إلى تركيا

طريقة حجز ارخص تذكره طيران ذهاب وعودة إلى تركيا
ازاي تحجز ارخص تذاكر طيران رايح جاي لتركيا ب 2608ج ؟!
ازاي تقدر تنزل سعر التذكره من 7000 ج ل 2608 ج ؟!!
الطبيعي اللي الناس بتعمله كلها ، أنها تتدخل علي الطيران اللي تعرفه قبلها بكام شهر زي الطيران المحلي وتتدخل تدور علي المواعيد اللي دخلتها فبيطلعلها مبلغ وقدره ، فتتقفل من الرحله او تتصل بشركه سياحه وتسأل علي التذاكر ..
الصوره الاولي ...رحله لتركيا كمثال علي الخطوط المصريه او التركيه
التذكره ب 7000ج علي الخطوط التركيه و 5752ج علي الخطوط المصريه.
البوست الحقيقه محتاج تركيز وشويه مجهود ، لأن ماحدش بيطلع علي الطياره بيكون حاجز زي اللي جنبه ، فعشان كده محتاجين نفهم الشركات ديه بتعمل معانا ايه بالضبط وازاي نقدر نجيب ارخص سعر موجود حاليا ..!!!
في البوست ده هنعمل مثال حي أننا بندور علي أرخص تذكره نقدر نروح بيها تركيا في الفتره من شهر ٤ -٦ / ٢٠١٨.

أول خطوه : هنفتح skyscanner هندخل فيه اننا مسافرين من القاهره ومحددين الوجهه بس لسه مش محددين مواعيد ، بنشوف بس ارخص شهر للوجهه ديه اللي فيها الاسعار منخفضه
قارنا بين الاسعار في شهر ابريل ومايو ويونيه
ولاقينا ارخص سعر طلعلنا في شهرابريل يوم ٢٠ /٤
اتجاه واحد ب ١٦٧٢ج(صوره ٢)
تاني خطوه : بنشوف بقي اقرب يوم نقدر نرجع فيه بسعر حنين بردوه😅
فطلع عندنا ارخص سعر نقدر نرجع فيه هوه ٥ مايو
ب ١٦٧٦ ج ( صوره ٣)
يعني كده اللي لاقيته رحله لتركيا رايح جاي من القاهره لاسطنبول والعكس ب ٣٣٤٨ ج
طب أنا عاوزه ارخص من كده ؟؟؟ أعمل ايه ؟!🤔
شد حيللك شويه يا حاج بسطويسي ،السعر لسه عالي علينا 😀😀
طب نبص كده علي اسعار الرجوع مره كمان ، لاقيت تذكره عوده سعرها غريب اووي زي ما موضح في ( صوره ٤ ) تمنها ٨٣٧ ج بس 🤔🤔
طب هنغير تاني مواعيد ؟!😩
اه طبعا نغير خطتنا ويبقي عندنا شويه مرونه عشان نقدر نجيب ارخص سعر 😉
فاختارها أن ديه هتبقي العوده يوم ٩ /٤
وهدور تاني علي تذكره ذهاب رخيصه من القاهره لتركيا ، لاقيت يوم ٢٧ /٣ وفي بردون يوم ٢٤ /٣ لو عاوزه اقعد فتره اطول هتعمل حوالي١٧٧١ ج
( صوره ٥)
يبقي كده الرحله بتاعتنا رايح جاي عامله٢٦٠٨ ج
طيب عاوزه بردوه اضمن اني اخدت احسن سعر... مايكونوش مزودين ٥٠ ج ولا ١٠٠ ج هنا ولا هنا 😅😅
ندخل علي الخطوط نفسها ونشوف السعر في نفس المواعيد AeGean airlines فطلعت عامله ٣٩٠٧ ج يعني أغلي
(صوره٦)
طب نشوف الرحله رايح جاي في نفس المواعيد علي skyscanner بكام ، ممكن تكون ارخص ؟؟
طلعت عامله 3.256 ج ..فالاحسن ان نحجز كل واحده لوحدها ( صوره ٧ )
طب نشوف محركات بحث تانيه زي expedia و
‏e dream و kayak ، wego ، cheap flights، gogate، kiwi
طيب لو اتاكدنا ان ديه فعلا ارخص حاجه ، نحجز علي طول ، لان ممكن تتغير في اي لحظه وفي اي وقت ، مافيش اي قواعد نهائيا لاسعار تذاكر الطيران .
طب في شويه ملاحظات مهمه اووي لازم تاخدوا بالكم منها
١.الطيران الاقتصادي ديه بيعتمد بالاساس علي حاجات تانيه يقدر ياخد منك فيها فلوس زي ايه ( زي الوزن أنه متلا يحددلك وزن معين زي شنطه في اليد مثلا وتشتري وزن تاني )
او انت جاي تدفع تلاقي ضاف لك تأمين ، وجبه ، كرسي )
فلازم تبقي مصحصح اووي وانت بتحجز التذكره وتقرأ كل التعليمات لان انا مره وقفت علي كيلو واحد وكانت الطياره هتروح مني ومصممين اضيف ٢٠ ك او اسيب الكيلو وكان تمن الاضافه قريب من تمن التذكره.
٢.هوه معني اني لاقيت ارخص تذكره وانا مسافر تركيا علي سكاي سكانر ، أن ده افضل موقع بحث استخدمه بعد كده للبحث عن تذاكر تانيه
الحقيقه لأ
ممكن مايكونش احسن حاجه تحجز منها لاوربا او آسيا ، ممكن kayak او expedia او غيره يطلع نتايج احسن ، فمتعدمتش علي موقع بحث واحد ولازم تبذل شويه جهد عشان تلاقي تذكره رخيصه .
٣.ساعات خطوط الطيران نفسه من الموقع بتاعه ارخص وساعات بيبقي اغلي ، فلازم بردوه تشوف علي الطيران نفسه التذكره بكام وهل هيا نفس السعر ولا ارخص .
٤. هل احجز تذكره قبلهاب٣ شهور ارخص ولا قبلها باسبوع
المواعيد مش هتفرق اوي غير في المواسم.. انا مره حجزت تذكره قبل طلوع الطياره بكام ساعه بنفس سعرها اللي كانت عليه قبلها بتلات شهور ومره اتعملت فيا والتذاكر غليت فجاءه وبدون اي اسباب
بس الاحسن ماتغامرش بدل انت متأكد انك مسافر في التوقيت دن .
٥.حاجه مهمه اوي وانت بتجي تعمل سيرش من علي موبيلك او اللاب ... ممكن تلاقي السعر غلي معاك وانت جاي تعمل سيرش تاني عشان تحجز ، الحقيقه هوه مغلاش ولا حاجه بس انت اما عملت مره واتنين وتلاته ، هما قالوا هوه اكيد هيحجز التذكره ديه لانه محتاجهافغلوا السعر، فحاول تعمل clear history
كل شويه زي ( صوره ٨ ) اما عملت سيرش علي المعاد ده علي اكتر من ١٠ مرات ومن مواقع سيرش محتلفه فعرف أني محتاجه التذكره ديه فغلاها بس اما مسحت ال history رجعت لتمنها الاصلي بعدها بدقيقتين ( خدوا بالكم من الوقت اللي فوق كده ) .
البوست ده مثال فقط ازاي تدوروا وازي تلاقي تذاكر طيران رخيصه لاي وجهه انت عاوزها وممكن تتطبقه علي اي وجهه تانيه ومحدش يجي يقولي انا عاوز اسافر المكان الفلاني ياريت تتدوريلي ..أنت اللي لازم تتدور بنفسك وأنت اللي لازم تبذل شويه مجهود وتقعدلك كام ساعه تتدور
في ملحوظه مهمه جدا جدا : وأنت جاي تحجز لأي جهه لازم تشوف في تراتنزيت ولا لأ وتاأكد بلد الترانزيت بتحتاج فيزا ترانزيت ولا لأ
لأن انا مره جيت احجز تذكره عن طريق الهند وكانت ازخص ٥٠ دولار بس لاقيت الهند ما بتنزلش حد في مطارها غير اما يبقي معاه فيزا ترانزيت ... وعشان اعملها سريعا هتكلفني ،ومعظم دول اوربا نفس النظام
بدل اما تلبس أنت والتذكره في الحيط
ملحوظه: انا عامله البحث ده النهارده ، النتائج قابله للتغير في كل لحظه ومافيش اي حاجه بتحكم لعبه تذاكر الطيران
وممكن بسبب ان كذا حد هيعمل سيرش في نفس الوقت ، تمن التذكره يغلي فجاءه وممكن يثبت
انا في البوست ده بيديكم طريقه ووسيله بس ازاي تتدورا علي أرخص تذاكر للطيران ، مش التذكره ديه نفسها
هتكلم عن اماكن الاقامه والحاجات اللي ممكن تعملوها والاماكن اللي تقدروا تزروها في اي بلد والمواصلات..

إرسال تعليق