تحذير | لو أنت عربى اياك والسفر لكوريا الجنوبية

تحذير | لو أنت عربى اياك والسفر لكوريا الجنوبية
نصيحه لكل الشباب من اخ لاخواته متفكروش تسافروا كوريا الجنوبيه نهائى علشان هترجعوا غير الخساره اللى هتخسرها والبهدله اللى هتتبهدلها طول الرحله هو اه مفيش تاشيره وبتاخدها من المطار بس مش بيدخلوا مصريين ولا سوريين ولا عرب نهائى المصريين وكل الجنسيات العرب ف الحجز والمعامله زفت والله دا غير ان ف ناس كتير بتبقي طالعه تقريبا فلوس السفر كلها مديونه بيها واوسخ معامله ناس كتير فى الحجز و حكاية إنك معملتش مشكلة و عايز تيجي تجرب حظك و تحاول تدخل غلط لأنك كل مره هتيجي بدون سبب مقنع و من غير ما تكون عارف تاخد وتدي مع ظابط الجوازات و فاهم كوريا كويس و تقدر تقنعه بإنك جاي سياحه هترجع تاني بكل بساطه .. كل يوم وديه مصريين مترحلين او في المكتب و اللي جايب مراته و اللي جايب واحده من الشارع علشان تعمل كأنها صحبته و تدخله و اللي لابس بدله و عامل رجل اعمال و اللي لابس حلق و عامل نفسه .... كل ده لا يعني شيئ لظابط الجوازات لا الشكل و اللبس ولا الشعر و اللون .. 


و كفاية الناس اللي عماله تدي معلومات غلط للناس و تعشمهم إن الدنيا وردي و جميلة و تعالو جربوا حظكم .. فيه ناس بتبقى مستلفه فلوس السفر و بايعه اللي وراها و اللي قدامها علشان تيجي كوريا و في الاخر بييجوا يعملوا لجوء و بعد سنتين تلاته يكسروا .. يا خونا اللي عايز يسافر بجد و يعيش و ياخد إقامه و جنسية يروح دوله اوربية او امريكا مثلا اي حاجة غير كوريا .. كوريا لا بتدي إقامه ولا بتدي جنسية و لا الحياة فيها صعبة بسبب اللغة و عادات الكوريين مختلفة عن عاداتنا و اكلهم كمان .. اللي بيفكر في السفر لازم اول حاجة يعرفها إن السفر ده نصيب و مكتوب يعني ممكن تفضل طول عمرك تحاول تسافر و تروح و تيجي و تعمل اللالي و في الاخر مفيش فايدة .. وممكن تبقى قاعد لا بيك ولا عليك و تلاقي حد بيكلمك بيقولك يلا هنسافر و تسافر و تدخل و تعيش و تتشغل .. مكتوب و نصيب و اللي عايز يسافر بلد لازم يذاكرها و يعرف عنها كل حاجة .. انما تقولي جاي سياحه و انت متعرفش حاجة في كوريا و متعرفش اصلا تتكلم انجليزي ولو ٢٠ في الميه و بتعتمد على الفهلوة و شوية لبس و نظارة شمس و شنطة سفر و سماعه في ودنك و جل في شعرك يبقى ما تستاهلش إنك تخرج بره المربع اللي انت عايش فيه .. مع احترامي للجميع .. لكل مجتهد نصيب و ربنا مش بيضيع تعب حد ابدا .. للاسف كله عايز يقلد و كله عايز يبقى زي فلان اللي سافر لان معظم الناس فاكره اللي مسافر ده بيلاقي الفلوس في الشارع و عايش في الهنا .. محدش عارف ان االي بيسافر ده طالع عين اهله و بيتفحت و يمكن بيتهان و يتمسح بيه البلاط كمان .. ربنا يصلح حال الجميع و يرزق كل مجتهد و ييسرله كل الامور .وديه صوره الناس فى الحجز فى المطار ربنا يصلح الحال للكل

إرسال تعليق