كل ما تريد معرفته عن ماليزيا قبل السفر بالصور

كل ما تريد معرفته عن ماليزيا قبل السفر بالصور
بوست عن ماليزيا حاحول ادعمه بالصور قريب باذن الله
1- ماليزيا حلوة جدا و محتاجه وقت عشان تخلص فسحه .. اقل حاجه ١٠ ايام
2- مافيش فيزا .. بتدخل بالباسبور المصري عادي ..
3- اول ماتنزل المطار اشتري شريحه عشان النت والاتصالات بالتاكسي و جراب..
4- المواصلات:
**عندهم حاجه زي المترو كذا نوع و سعرها رخيص و في باصات بتودي كل مكان بعيد .. انا استعملتهم مرة واحده كا فسحه للاولاد.
** برنامج جراب grab افضل مليون مرة من اوبر و ارخص بكتير من التاكسي العادي و اسعاره ثابته و كمان ممكن تختار نوع السيارة لو عايز سيارة كبيرة او ماشابه و تقريبا كل السواقين محترمين جدا و خدومين من ناحيه المعلومات .استخدمته في معظم تنقلاتي











** الجو باص موجود قدام كل المناطق المهمه هناك و بيكون باص عادي بس مجاني .. و له خريطه ممكن تاخده من اي مكتب سياحه مجانا .. و الباص التاني hop on and off بيكون دورين و بيلف على اماكن اكتر و كمان فنادق كتير .. و ممكن تحجز اونلاين او تركب على طول و تدفع .. تذكرته ٤٠ ربنجت تقريبا ..
5- الفنادق و الطيران الداخلي :
- الفنادق في كوالا ابحث في منطقه اسمها بوكت بينتانج دي كل حاجه قريبه لها و شارع العرب و المولات الكبيرة و منطقه حيه و امان .. انا نزلت في ريسدنز اسمه e&o المكان حلو جدا لعيله صغيرة بس مستوى الروم سيرفس سيء . و اصحابي نزلوا في منطقه اسمها صانواي لاجون و بيشكروا فيها جدا بس هي بره كولا.
- لانجكاوي خدي فندق في وسط البلد فيه فندق كويس و سعره معقول اسمه اديا ADYA .. و فيه ريزورتس اغلى من دبي .. لو عايز ريزورت جرب Meritus .. عشان منطقته بتاعه سياحه و حيه بالليل ..
6- زيارات كوالا
أ- صنواي لاجون ( مدينه العاب و ملاهي ماءيه كبيرة جدا)
ب- كوالامبور المدينه فيها كذا حاجه لو مستعجل تخلصهم في يومين ..
-حديقه الفراشات و الطيور جنب بعض .. ( ظريفه )
- الجولة بتاعه كوالا بالسيتي بص .. كل الاماكن السياحيه ..و في باص مجاني اسمه جو بص نفس النظام بس اقل ..
- المسجد الاكبر و جنبه المتحف الاسلامي
- مصنع الشكولاته و مصنع الجلود
- البرجين و klcc و برج كمان كده جنبهم و في حديقه جوة مول klcc فيها نافورة راقصه
- المولات pavilion و barjiya square و china town , central market
- باتو كيفز batu caves ( ماتطلعش السلالم مش مستاهله .. ممكن تدخل الكهف اللي تحت )
ج* لازم تروح جنتج فيها اوتليت مول جلو جدا و التليفريك (بيكون زحمه في الصعود) ..
د* كامرون هايتس .. مزارع شاي و فراوله و فواكه و مساحات خضرا و جو حلو .
ه*منطقه اسمها افاموسا فيها حديقه حيوان و اوتليت مول حلو برضه .. حديقه الحيوان اللي هناك حاتعجب الولاد لان فيها عروض كتير .. ماتفوتش ركوب الافيال فيها و عرض الكاوبوي
7- زيارات لانجكاوي:
لانجكاوي جزيرة مناظرها الطبيعيه تحفه
- التليفريك و السكي ووك ( التذكرة بتديك دخول لكذا اكتيفيتي تحت و هم جمال جدا و لازم تجربهم منهم متحف 3d حاتتصور صور حلوة هناك)
- رحلة المانجاروف ( حلوة جدا )
- فيه كذا حاجه تانيه زي مزرعه فراوله و مصنع شيكولاته و رحلات بالبيتش باجي
- في رحله تانيه اسمها ايلاند هوبنج ماتروحهاش 
- استمتع بالريزورت يوم
- باليل في شارع بتاع سياحه حلو جنب ريزورت موريتوس
نصايح عامه:
* الرنجت تقريبا نفس سعر الدرهم الاماراتي . و يعمل ٤.٥ جنيه
* حاول تستخدم هاند باجز بس في سفرك عشان الطيران الداخلي بياخد فلوس على الشنط الكبيرة اكتر من سعر التذكرة نفسها . الهاند باجز فري
* استخدم skyscanner عشان تحجز كل طيرانك حتى الداخلي
* استخدم booking و agooda عشان تقارن و تعرف اسعار الفنادق .. انا استخدمت اجودا اكتر
* الجو فيه رطوبه فا هاتتضطر تغير طقم او 2 كل يوم تقريبا . شوف فندق او ريسدنز فيه غساله و مكوة
* معظم الفسح الصبح بدري و المولات كمان بتقفل 10 تقريبا
* اسال كذا شركه سياحه من الموجودين في الشوارع عن سعر الفسح اللي حاتختارها لان كل واحدة حاتديك سعر مختلف و هم تقريبا كلهم بيقدموا نفس الخدمه بالضبط بنفس نوع القوارب و السيارات
* المطاعم العربيه في لنجكاوي سيءه جدا
* الطيران الداخلي بيضيع اليوم مهما حاولت فا الافضل تروح لنجكاووي بالعبارة اللي في البحر و تعتبرها رحله .

إرسال تعليق