كل ما تريد معرفته عن المغرب لو أول مره هتسافر هناك

كل ما تريد معرفته عن المغرب لو أول مره هتسافر هناك
انا لسة مش مصدقة اننا عندنا دولة عربية بالجمال ده. ما شاء الله عليها يارب احفظها. احكيلكم ايه ولا ايه على جمال الطبيعة ولا روعة الحضارة المغربية و الاندلسية هناك. رحلتى بدات بمدينة كازابلانكا ونزلت فى المطار اللى ميفرقش كتير عن مطارات اوروبا وبعد كده اخدت قطر لوسط البلد. اول ما دخلت البلد كان فيه احتفال كبير فى الشارع وفرق الفلكلور المغربى بتعزف وتغنى وتطبل بمناسبة زيارة ملك المغرب لمدينة كازابلانكا ومروره من هذا الطريق واهل البلد بيضحكوا والسياح بيصوروا الحدث ده. كازابلانكا فعلا اسم على مسمى فمدينة الدار البيضاء كل مبانيها بيضاء والمبانى دى يعنى كل حاجة بيوت وفنادق ومدارس ومستشفيات و الخ... النخل والورد فى كل حتة حواليا واهم حاجة بتميزهم انهم عندهم ميادين كتير وواسعة اوى. اكثر ما يميز كازابلانكا انها بتطل عالمحيط الاطلنطى والشاطيء هناك سيشعرك بهدوء وراحة. بس من وجهة نظرى كازابلانكا كفايه عليها يوم او اتنين عشان هى تشبه مدينة الاسكندرية. 


الاكل اللى هم مشهورين بيه اوى الكسكسى والطاجين والمشويات. لازم قبل ما تروح تبقى عارف اسماء مطاعم كويسة عشان مش كل المطاعم بتعمل الاكل بنفس الكواليتى. الشعب المغربى معتز اوى بالطابع الاندلسى خصوصا فى فن العمارة والنقوش المتميزة اللى لاقيتها فى كل مكان اروحه. قعدت يومين فى كازابلانكا اللى هى اكتر بتعرف بانها مدينة الاعمال فالناس بتروحها عشان المطار الدولى هناك يعنى لازم بتعدى عليها و بيتعمل فيها مؤتمرات عالمية كتير لكن بالرغم من كده هى مدينة سياحية بس غالية بصراحة. وبعدها انتقلت الى مراكش وهى اللى مشهورة اكتر بانها بلد سياحية. اول حاجة بجد لازم تتقال على مراكش بسم الله ماشاء الله والله اكبر. البلد عبارة عن حديقة كبيرة وفى وسطها مبانى كلها باللون السيمون المبهج اوى ده. شجر البرتقال فى الشارع عادى كده فى كل الشوارع والنخل فى كل حته والورد والوانه بس الورد هناك حاجه تانيه مفتح ومش دبلان ومش مترب والشجر لونه اخضر بيلمع نظيف مش عارفه اوصف ازاى. السياح اللى شوفتهم فى مراكش كانوا اكتر من اللى شوفتهم فى كازابلانكا وده عشان مراكش فيها معالم تاريخية اكتر والطبيعة الخلابة فيها و فى المناطق القريبه منها اكتر. انا زرت منطقة اسمها اوريكا تبعد ساعة عن مراكش بتطل على جبال الاطلس ونازل منها شلالات وبتجرى من تحتى الانهار وجنبها فى نفس المنطقة حتة اسمها ستى فاطمة بنفس جمال الطببعة واتبسطت اوى لما قالولى ان ستى فاطمة دى مصرية كانت عايشه هناك ودفنوها هناك. البلد منظمة ونظيفة جدا وريحة زيت الارجان اللى المغرب مشهوره بزراعته بس موجود فى كل مكان تروحه ده حتى موجود فى مكتب الصرافة اللى دخلته. طبعا فيه التزام باشارات المرور والموتوسيكلات كتير وملتزمين بالحارة اليمين ومن الحاجات اللى لفتت نظرى ان البنات بيسوقوا الموتوسيكلات. انا شفت كمان ستات مسنه وفلاحات بيسوقوا موتوسيكلات عادى. معلومة عالماشى انا عرفت ان الممثلة يسرا عندها فيلا فى مدينة اغادير وغيرها كتير من المشهورين بيقضوا اجازتهم فى المغرب. باختصار المغرب بلد جميلة وتستحق الزيارة وانا شايفه انها بلد مش واخده حقها فى الدعاية.

إرسال تعليق