دبي هل هي مدينة الاحلام ولا بلد زي اي بلد فيها الحلو وفيها الوحش

دبي هل هي مدينة الاحلام ولا بلد زي اي بلد فيها الحلو وفيها الوحش
لاحظت ان ناس كتير بتضرب بيها المثل ومعتقدين ان العيشه فيها حلم جميل ويمكن عندهم حق بس ليس كل ما يلمع ذهبا وساعات بتدفع تمن البريق ده غالي.
انا عايشه في الامارات من 2007 ل 2014 في ابوظبي و والباقي في دبي.
دبي بلد اللي عاوز يعيش فيها لازم يكون قد المعركة اللي هيدخلها خاصة لو عنده اسرة ومسؤوليات الشغل هنا مفيهوش رحمه ولا تهريج وفعليا هتتحول روبوت تشتغل عشان تجيب فلوس عشان تروح على اساسيات الحياة . اكل . شرب . مدارس + الايجار اللي بيوصل ل ثلث راتبك بالمستريح ده وانت عايش بالمينمم وواخد اصغر مساحه ممكن تحتاجها.



الخروج مرة يوم الجمعه فقط وساعات ساعتين كدا وسط الاسبوع عشان اعرف اكمل بقيت الاسبوع بطاقة.
لازم الزوجين يشتغلو عشان يلاحقوا لان كل حاجه بتغلى كل يوم وده غير ان واحد فيهم يكون داعم للتاني لو تعثر في شغله واضطر يسيبه لاي سبب علما بان المتوسط في انك تلاقي شغل جديد غالبا بيوصل من ٦ شهور ل سنة وفي ناس اكتر.
من الامثلة عالغلاء انا في 2012 كنت بملا عربيتي بنزين ب 80 درهم دلوقتي وصلت 135 كل الخدمات بندفع عليها فلوس .. لو ركنت عربيتي في الشارع 9 ساعات الشغل بدفع 30 درهم في اليوم يعني مبلغ وقدرة في الشهر دلوقتي للي ميعرفش بقا في قانون الضريبه المضافة على بعض السلع والخدمات وده قيمته 5%،لو اخدت رادار وانت سايق بتدفع ٦٠٠ درهم مقفلة وجل من لا يسهو يعني لازم هتاخدلك كم مخالفه في السنة.
اه هتاخد علاج وامان ونظافه بس هتدفع المقابل
الفكرة بس اني فعلا مش عارفه هل اللي بناخده من العيشه هنا يستاهل اننا نلغي قيمة اهلنا ووجودنا معاهم في الوقت اللي هما محتاجينا فيه ؟ انا مثلا ملحقتش اشوف والدي واتدفن قبل ما اوصل مصر.
ولادي هيطلعوا ناقصين الخشونه اللي اتربينا عليها وديه مصيبه لو فكرت يوم ارجع وهيبقوا مسخرة العيال اللي فسنهم.
اللي بيقول بقا مبترجعوش ليه هقوله هرجع معنديش شقة اقعد فيها .. معنديش شغل اشتغله .. معنديش صحاب خلاص لان كل واحد ملهي في حياته واللي بيسافر بيتنسي من كل الحسابات .. معنديش طاقة ابني حياة جديدة من الصفر تاني ولا حتى عندي الامكانيات . يمكن لو رجع بيا الزمن مسافرش تاني بس الرجوع بدون كل اللي فوق قرار صعب.
انا راضية بحالي مش ناقمة بس احاول اوضح ان العيشه مش وردية اوي كدا والله والقرار في الغربة صعب مش سهل.
ياريت اللي عنده اضافه اوتجربة يحب يحكيها يكتبها بردوا عشان الناس تستفيد اسفة لو طولت عليكم.
اضافه اخيرة: ياريت نعبر عن راينا بدون اساءة لا لمصر ولا الامارات كل بلد فيها القبيح والحلو

إرسال تعليق