بالتفاصيل رحلة إلى بورسعيد أرخص من فسحه فى القاهرة

بالتفاصيل رحلة إلى بورسعيد أرخص من فسحه فى القاهرة
ندخل في الموضوع علي طول هنبتدي رحلتنا لبورسعيد من محطه مصر القطار المميز سعره (11 جنيه) بيتحرك الساعه 8:45 صباحا من القاهره يوصل بينا بورسعيد علي الساعه 12:30 ظهرا مبدأيا كده بورسعيد صغيره يعني اوضه وصاله تسعيره الميكروباصات هناك ب 1.5 والتاكسي داخل نفس الحي 5.5 ومن حر لاخر ب 6.5 و المدينه كلها ب 7.5 عموما انا لفتها كلها كعابي كالعاده 
هنطلع من محطه القطار هنلاقي قدامنا حديقه الفارما هانمشي من جنبها يمين هنلاقي تمثال للرئيس الراحل محمد انو السادات وبعد كده هنلاقي شارع اسمه مصطفي كامل هتمشي فيه 5 دقايق هتلاقي قدامك مبني هيئه قناه السويس من السور الخارجي هناخد شارع رمسيس شمال من مصطفي كامل هنلاقي نفسنا في ميدان المنشيه هناخد يمين هنلاقي المعديه بتاعت بور فؤاد طبعا دي ببلاش حتا لو ركبتها مليون مره محدش 




بيسال فيك وطيور النورس تطير من حواليك هننزل بور فؤاد هنلاقي مسجد كبير جدا وطرازه جميل اسمه مسجد المجمع الاسلامي هنمشي من جنبه شمال هنلاقي بيوت من دور واحد جميله جدا نفس الشكل والمساحات تحس انك بره مصر وعندك كنيسه مارجرجس وحديقه المنتزه ولف وارجع تاني علي المعديه وانزل بورسعيد وخد يمينك علي المشايه الشارع ده كله تحفه معماريه من اوله لاخره اول حاجه هتقابلنا مبني سيمون بعده شويه بيوت اثريه علي الطراز المعماري القديم تبهر شبه بتاعت وسط البلد وبعدها فنار بورسعيد القديم نكمل شويه هنلاقي حديقه التاريخ والمبني الايطالي القديم وبعدها علي طول قاعده تمثال ديليسبس في مدخل قناه السويس وبكده نكون خلصنا الشارع ده هناخد بعد كده شمال شارع طرح البحر ولو عاوزين نتمشا شويه في شارع الشهيد عاطف السادات دا بيطل علي البحر المتوسط بس دا بيفضل يبقا التمشيه فيه بليل المحلات بتبقا منوره والشارع جميل جدا ونضيف من احسن شوارع في مصر اللي مشيت فيها بجد فيه كل حاجه من قري سياحيه وفنادق وبنوك ومطاعم ومحلات ملابس وحدائق وفيه بردو نادي واستاد المصري البورسعيدي واللي حابب يتمشي شويه علي البحر فا منظر القواقع والصدف فيه جميل جدا من اوله لاخره القواقع مغطياه الشارع الموازي ليه اسمه 23 يوليو هنلاقي فيه متحف بورسعيد الحربي وبعده مديريه امن بورسعيد قصادها مسله الشهداء ومتحف النصر للفن الحيدث ومطرانية السيدة العذراء والمسجد التوفيقي في شارع سعد زغلول نيجي بقا لاشهر الشوارع لشراء الملابس هنلاقي التلاتيني والحميدي والتجاري وكلهم ورابعض وموازين لبعض بس متتعبش نفسك هما يعتبرو شوارع نسخه من الموسكي و العتبه ونفس الاسعار بعدها هنكمل تمشيه هنلاقي سوق الباله الكبير دا اكبر سوق للملابس المستعمله وفيه بردو في حي الزهور ويوجد ايضا بحي الزهور مقابر الكومنولث بس احب اقول لاي حد عنده فكره مسبقه ان بورسعيد الملابس فيها رخيصه وبربع التمن احب اقوله مش هتلاقي ننتقل بقا للجد قدام بقا سوق الباله علي طول سوق السمك الكبير فيه انواع لاتحصي من السمك تختار اللي تحبه ويجهزهولك نخلص ونرجع نركب قطار الساعه 7:30 مساء ونرجع بالسلامه علي القاهره انشاء الله واللي حابب يقضي الليله هناك فيه نزل الشباب هناك بجوار استاد النادي المصري الليليه ب 42 جنيه شامله واجبه افطار مكانه جميل ومتميز ونضيف

إرسال تعليق